بتبلّش المشاكل عادة في المسلسل السوري بعد اختيار النص مباشرة، تعا طبِّق مخرج بيناسبنا على هالكاتب، لأنو ما شاءالله هاد ما بيهضمه لنص هاد، وهاد ما بيعجبه إ***ج هاد، وبيبلش الدفع اللي ما كان بالميزانية ولا كان بالحساب، كل عام بيبدا تصوير مسلسل عنا بحفلة تبويس شوارب بين الكاتب والمخرج برعاية الشركة المنتجة وفي مطعم فوق السحاب، وطبعاً يليها تطبيق ممثلين لهالكاتب ولهالمخرج، وهي شغلة المنتج البحتة لأنو مستحيل المخرج يحلها، حتى لو كان كوبولا أو ريدلي سكوت اللي أخرج لغسان مسعود مشاهد صلاح الدين،
فإذا كانت حفلة الكاتب والمخرج بتنقضى بالفورسيزونز فحفلة النجوم ما بتنحل غير بلبنان، متعودين يبوسوا شوارب بعض خارج القطر، وطبعاً عندك حفلة ما بعد الشارة لجميع الممثلين لفش خلقهم بسبب ترتيب الأسماء، حفل الكل فيه مزعوج، مقروق، مع أنه حفل، حفل ما حدا مبسوط فيه غير اللي اسمه أول اسم.
ولسّه في حفلات التوزيع، وهون بيتحول المنتج لدليل سياحي من كتر ما بيعزم مدراء محطات عربية، وبيقضي مع كل مدير ثلاثة أيام بلياليها في دمشق القديمة، وبتلاقيه مع المدير بنصاص الليالي واقف قدام قصر العضم وعم يشرح له عن قيمته التاريخية، وبعد ما يعرف المدير قيمته التاريخية، بيعطي وعد ش ف وي بأنو المحطة رح تشتري العمل، وبيعطي سعر ش ف و ي للحلقة، وبيعطى وقت عرض ش ف و ي للمسلسل برمضان، وبيجي شعبان..وعادة بهالشهر بيطيروا كل المدراء وبتطير معهم وعودهم الشفوية، وبيجوا مدراء جدد، ووينك يا دمشق القديمة من جديد.
الرئيسية 
