ممثل

...أمّا السوري فإذا سألته شو بتشتغل حضرتك بيقلك ممثل، ما في سوري ما مثَّل أو رح يمثِّل، أم بيحكي ابنها نكتة، بتاخده إسعاف لأقرب مخرج. فوتوه عالتمثيل دخيلكن الولد فلجة، صبيّة حلوة شوي كل رفقاتها بيقولوا لها روحي عالتمثيل..اللي عم يطلعوا مو أحلى منك، وهاد اللي بيجيك وهو قاري كلّ مسرح العالم،
وبيقلك ما حدا مثقّف قدي وبدي أمثل، وهاد اللي ما فلح بشي بيجيك أبوه بيقلك والله هالولد طلع طلطميس بكلّ شي، لا فلح بالدراسة، ولا فلح بالشغل، بس بالله دمه خفيف وبيفقّع من الضحك، شوف لنا اياه بلكي بينفع بالتمثيل، وفي كمان اللي بيكون بالصدفة ماشي بالشارع بينط له شي منفذ انتاج وبيقله بمعيتك معلم تعا مثّل معنا هالمشهد، فإذا كنت أشقر ممكن يجيك دور ضابط فرنسي، حاكم أشقر شي عنا بالدراما شبه المعاصرة هو الفرنسي، بس بالتاريخي روماني، وبتلاقي ممثل الصدفة حايص من لوكيشن للوكيشن عسى ولعل يترتب معه دور من جديد، وما حدا فهم هاللعبة غير الكيلاني المختص بدور الشرطي، جابوه على دور شرطي مرة، قام الزلمة فصّل لحاله بدلة شرطة، وحدة صيفي ووحدة شتوي، وقرّر يلعب دور الشرطي طول عمره، بتتصل فيه بتقل له بدنا اياك بدور شرطي، بيسألك لشدة احترافه: صيفي الا شتوي، وأكبر رتبة لعبها كانت رائد، وبعدين جاب قرايبه، قال اشتريت له بدلة شتوي، وإذا أثبت نفسه بالشتوي رح أشتري له الصيفي، وهلأ صار عنده دورية كاملة، بتتصل فيه بتسأله بدي دورية، بيقل لك شو نوع الجريمة، لأنو بيحب المصداقية، ممكن الجريمة يكون بدها دوريتين، وفي عندك الممثل اللي بيصير ممثل بفلوسه، معه وألله كافيه، بيفتح شركة وبيمثل، وبيعصلج معه التوزيع، فبينقذه حمال الأسية أسامة صاحب شركة غزال، وهيك بيضل يمثل لحتى يقول له أسامة صاحب الغزال حاج، بيكفي.عندك.